كل حاجة خطوة بخطوة

١التسطيب وأول تشغيل

1. فك ضغط فولدر PosMasr في مكان زي C:\PosMasr أو على الديسك توب (مش جوه Program Files) — أو استخدم المثبّت.
2. شغّل إنشاء اختصار.cmd مرة واحدة: بيعمل اختصار على الديسك توب، وبيسألك لو عايزه يشتغل مع ويندوز (دوس Y).
3. افتح البرنامج. بيفتح على الشاشة كلها، وبيعمل فولدر data جنبه فيه الأصناف والإعدادات الافتراضية.
4. ادخل الإعدادات ← الأصناف وعدّل الأسعار.
5. وبعدين الطابعة والفاتورة (اختار الطابعة وعرض الورق)، والاختبارات ← طباعة تجريبية.

٢الدخول والحسابات (الكاشيرية)

في أول تشغيل البرنامج بيطلب منك تعمل حساب المدير (اسم وكلمة سر)، وده ليه كل الصلاحيات. بعد كده في كل مرة بتفتح بتظهر شاشة الدخول: اختار المستخدم، اكتب كلمة السر، ودوس دخول.

• المدير: كل حاجة (بيع، تقارير، مخزون، أجل، أصناف، إعدادات، خروج).
• الكاشير: البيع بس. أزرار الإدارة مش بتظهرله.
• عشان تضيف كاشير: الإعدادات ← المستخدمين ← إضافة مستخدم. ومن هنا كمان بتغيّر كلمة السر أو توقف حساب.
• تبديل الكاشير في الشريط اللي فوق بيفتح شاشة الدخول عشان تسلّم الوردية من غير ما تقفل البرنامج.
• كل فاتورة بتتسجل باسم الكاشير، والتقارير بتتفلتر حسب الكاشير.

٣البيع

• الأقسام على الجنب. دوس على قسم يظهرلك أصنافه بس.
• دوس على الصنف ينزل في الفاتورة. دوس تاني يزوّد العدد.
• حدد سطر، وبعدين + و − بيغيّروا الكمية، حذف بيمسح السطر، مسح الكل بيبدأ فاتورة جديدة.
• فتح الدرج، إعادة طباعة، إلغاء آخر فاتورة موجودين تحت الفاتورة.
• خانة البحث والباركود فوق الأصناف: اكتب جزء من الاسم يفلترلك، أو امسح الباركود والصنف ينزل على طول. الخانة جاهزة للمسح دايماً.
• الأصناف اللي ليها مخزون بيظهر رصيدها بين قوسين، واللي خلص بيظهر باهت (أو بيتخفي لو فعّلت الخيار ده في الإعدادات).

٤الدفع: كاش، فيزا، أجل

كاش

1. دوس دفع.
2. اكتب المبلغ اللي الزبون دفعه، أو استخدم أزرار الفئات (+50، +100… وبتتجمع على بعض)، أو المبلغ بالظبط لو دفع الإجمالي.
3. دوس موافق: الفاتورة بتتحفظ وتتطبع (لو مفعّل)، الدرج بيفتح، والباقي بيظهر بخط كبير.

فيزا

1. خد الفلوس على ماكينة الفيزا الأول واتأكد إن العملية تمت.
2. دوس بطاقة وأكّد المبلغ. الفاتورة بتتسجل مدفوعة بالفيزا (من غير باقي ولا درج)، وبيتكتب عليها «طريقة الدفع: بطاقة».

أجل

1. بعد ما تختار الأصناف دوس أجل.
2. اختار زبون موجود أو اكتب اسم جديد (ورقم تليفونه). موافق.
3. الفاتورة بتتحفظ على حساب الزبون وبتتطبع باسمه والمبلغ اللي عليه.

زرار أجل في الشريط اللي فوق بيفتح شاشة «مين عليه كام»: كل الزباين واللي عليهم، كشف حساب (كل فواتيره ودفعاته، وبيتطبع)، تسجيل دفعة لما يدفع، وطباعة كل المستحقات كنسخة ورق.

٥الطابعة والفاتورة

• الطابعة: اختار الطابعة الحرارية. «الافتراضية» يعني طابعة ويندوز الافتراضية.
• عرض الورق: 80 مم (الأكتر انتشاراً) أو 58 مم. سيب عرض منطقة الطباعة 0 وهو يحسبها لوحده.
• حجم الخط: 100٪ عادي. لو الطباعة صغيرة جرّب 110 أو 125٪.
• عرض الشعار بالمم فوق الفاتورة (0 يعني من غير شعار).
• طباعة مع كل عملية بيع: فعّلها بعد ما الطباعة التجريبية تنجح.
• اسم المحل وسطر العنوان والتليفون وجملة الشكر موجودين في تبويب عام.

٦درج النقود

• متوصّل بالطابعة — الطريقة المعتادة: كابل الدرج RJ11 بيدخل في فتحة الدرج في الطابعة. سيب «الاتنين». في الوضع ده منافذ COM ملهاش أي علاقة.
• أمر فتح الدرج: أغلب الطابعات بتشتغل بـ ESC p (الافتراضي). لو مفتحش جرّب DLE DC4 أو BEL، أو أمر مخصص من كتالوج الطابعة.
• إرسال النبضة جوه أمر طباعة: بعض الطابعات محتاجة كده.
• متوصّل بالكمبيوتر: بس لو الدرج بوصلة USB/Serial. اختار المنفذ، أو دوس اكتشاف منفذ الدرج في الاختبارات.
• «فتح الدرج مع كل عملية بيع» بيفتحه لوحده لما تأكد الدفع الكاش.

٧الباركود وطباعة الملصقات

• حط لكل صنف باركود من شاشة الأصناف: اكتبه أو امسحه في الخانة.
• في شاشة البيع، المسح بينزّل الصنف، والمسح تاني بيزوّد العدد.
• في المخزون، المسح بيزوّد الرصيد واحد (استلام).

من شاشة المخزون اختار صنف ودوس طباعة ملصق:

• اختار الصنف ومقاس الملصق وعدد النسخ، وهتشوف معاينة بالحجم الحقيقي.
• مقاسات جاهزة: بكرة ٣ ملصقات 12×38 مم (باركود مدوّر)، ملصق الصيدليات المقسوم، ومقاسات مفردة (40×25، 50×30، 30×20، 60×40…). أو حدد العرض والارتفاع والأعمدة والمسافة بنفسك.
• كل ملصق عليه الاسم والسعر وباركود Code 128 بيتقري. والصنف اللي ملوش باركود البرنامج بيعمله واحد وبيحفظه.
• طباعة كل الأصناف بتطبع ملصق لكل صنف مرة واحدة. وتقدر تحدد طابعة ملصقات لوحدها من الإعدادات ← الطابعة.

٨المخزون والأرباح

• المخزون الحالي: كل الأصناف بالباركود والرصيد والمخزون الكامل وسعر الشراء وسعر البيع وقيمة المخزون. اللي ناقص برتقالي، واللي خلص أحمر. اكتب عشان تبحث، أو امسح عشان تستلم واحد. الأزرار: استلام كمية، تعديل الرصيد، تعديل.
• قرّب يخلص: اللي لازم تطلبه قبل ما يخلص، بنسبة من 10 لـ 50٪. بيوريك الرصيد والمخزون الكامل والنسبة والكمية المقترحة وتكلفتها.

الربح = سعر البيع ناقص سعر الشراء، فلازم تدخّل سعر الشراء لكل صنف (من المخزون أو الأصناف). والصنف اللي ملوش سعر شراء بيتحسب كله ربح.

٩التقارير

• اختار الفترة: النهارده، امبارح، الأسبوع ده (بيبدأ السبت)، الشهر ده، الشهر اللي فات، أو من/إلى ودوس تطبيق.
• المربعات الملوّنة بتوريك إجمالي المبيعات والربح وعدد الفواتير والأصناف ومتوسط الفاتورة.
• التبويبات: حسب الصنف (الأكتر مبيعاً)، حسب اليوم، حسب الساعة (وقت الزحمة)، حسب القسم، الربح، والفواتير (كل فاتورة، وتقدر تلغيها أو تطبعها تاني).
• فلتر الكاشير، وتصدير CSV بيحفظ الجدول اللي قدامك كملف بيتفتح في Excel (والعربي سليم).

١٠شاشة المطبخ

1. فعّلها: الإعدادات ← عام ← إرسال الطلبات لشاشة المطبخ.
2. هيظهر زرار المطبخ في الشريط اللي فوق — دوس عليه يفتح الشاشة، وبعدين حرّكها على شاشة المطبخ (لو فيه شاشة تانية متوصلة بنفس الجهاز).
3. ٣ أعمدة: جديد ← بيتحضّر ← جاهز. الشيف بيدوس على البون ينقله. ومسح الجاهز بيشيل الطلبات اللي اتسلمت.
4. بيظهر بس الطلبات اللي فيها صنف محتاج تحضير. والأصناف الجاهزة (مشروبات، سناكس) بتظهر مشطوبة عشان الشيف يشوف الطلب كامل.

شاشة المطبخ على جهاز تاني (بالـ IP)

1. على جهاز الكاشير: الإعدادات ← عام: اتأكد إن «إرسال الطلبات لشاشة المطبخ» مفعّل، وخد بالك من IP الجهاز ده اللي ظاهر تحت منفذ المطبخ (زي 192.168.1.10). الجهازين لازم يكونوا على نفس الشبكة.
2. على جهاز المطبخ: سطّب البرنامج وشغّله بوضع المطبخ (CSG-POS.exe --kitchen)، دوس إعداد الاتصال فوق، اختار عبر الشبكة، واكتب IP جهاز الكاشير والمنفذ (الافتراضي 8077). حالة الاتصال بتظهر فوق، وتقدر توصّل أكتر من شاشة.
3. ممكن ويندوز يسألك أول مرة تسمح للبرنامج بالشبكة — اسمحله. لو متوصلش، راجع الـ IP واتأكد إن الجدار الناري مش مانع المنفذ.

١١النسخة الاحتياطية والاسترجاع

الإعدادات ← الاختبارات ← النسخ الاحتياطي والاسترجاع بيفتح شاشة من جزئين:

• أخذ نسخة: اختار المكان — على القرص (جنب البرنامج) أو فلاشة USB (بتظهر لوحدها لما توصّلها) — ودوس أخذ نسخة احتياطية الآن. بيتعمل فولدر بتاريخ النهارده فيه الأصناف والإعدادات والشعار وزباين الأجل والمستخدمين وكل المبيعات.
• الاسترجاع: اختار مكان النسخ (أو اختيار مجلد…)، اختار نسخة من القايمة (التاريخ وعدد الفواتير)، علّم بس على اللي انت عايزه (الإعدادات والشعار / الأصناف والمخزون / زباين الأجل / المستخدمين / سجل المبيعات) ودوس استرجاع المحدد.

١٢الترخيص والتفعيل

البرنامج بيشتغل تجريبي ٧ أيام، وبعدها بيطلب التفعيل. والتفعيل مربوط بالجهاز:

1. افتح شاشة الترخيص: الإعدادات ← الاختبارات ← حالة الترخيص (وبتظهر لوحدها لما التجربة تخلص).
2. خد كود الجهاز (شكله كده CSG-XXXX-XXXX-XXXX) وابعتهولنا — زرار نسخ الرمز بيسهّلها.
3. هنبعتلك مفتاح التفعيل. اكتبه ودوس تفعيل. والبرنامج بيتفعّل نهائي على الجهاز ده.

١٣اسم محلك وشعارك

الإعدادات ← عام: اكتب اسم المحل (بيظهر فوق وعلى الفاتورة) واسم العلامة، ودوس تغيير الشعار عشان تختار صورة (بتتحفظ في data\logo.png). الاسم والشعار الجداد بيظهروا في عنوان النافذة والشريط اللي فوق والفواتير والملصقات، من غير ما تسطّب تاني.

١٤اختصارات الكيبورد