إدارة فرعين أو أكتر من موبايلك

وجع الفرع التاني

لما البرنامج متسطّب على كل جهاز، كل فرع بيبقى نسخة لوحده: أصنافه، وأسعاره، ومبيعاته، ونسخه الاحتياطية. كل نسخة لوحدها مفيهاش مشكلة. المشكلة في كل اللي بينهم:

• التليفون لكل فرع بالليل. عشان تعرف اليوم كان عامل إزاي، بتكلّم مدير كل فرع، تستنّاه يقرالك تقرير Z، تكتب الأرقام وتجمعها بنفسك. واليوم اللي ينسى فيه، مش بتعرف.
• الأسعار بتبعد عن بعض. المورد بيغلّي صنف؛ بتغيّره في المحل الرئيسي وتنسى التاني، أو التاني يغيّره وينسى يقولك. بعد شهر نفس الصنف بسعرين، والزبون الدايم بياخد باله قبلك.
• البضاعة في المكان الغلط. فرع بيخلص منه صنف قاعد مركون على رف الفرع التاني. نقله معناه تليفون، وواد شايل كرتونة، ونسختين كل واحدة لازم تتصلّح بإيدك — لو حد افتكر.
• كل حاجة تانية مرتين. قايمتين أصناف تكتبهم، ومجموعتين حسابات كاشيرية، وروتينين نسخ احتياطي، وزبون ليه أجل في فرع وغريب في التاني.

مفيش حاجة من دول كارثة من أول يوم. بيتراكموا بهدوء، ومع آخر السنة الأولى صاحب الفرعين بيبقى شغال سنترال.

السلسلة بتديك إيه

السلسلة هي كل اللي في البلاتينية بتاعة خطها، في كل فرع، والفروع كلها في حساب محل واحد على سيرفراتنا. كل فرع محتفظ بكاشيراته ومخزونه وعنوانه وتليفونه ورأس الفاتورة وذيلها، وإعداداته الخاصة في اللي عايزه يختلف فيه. وفوق ده:

• أصناف وأسعار مركزية. قايمة أصناف واحدة للسلسلة كلها. الأصناف ← قوايم الأسعار المركزية بتحط سعر واحد لكل الفروع، مع استثناءات لكل فرع تقدر تقفلها. تغيّر السعر مرة، يوصل لكل الفروع.
• مخزون لكل فرع. كل فرع ليه كمياته، واختيار الفرع فوق صفحة المخزون بيوريك مخزون أي فرع وقايمة نواقصه وتواريخ صلاحيته.
• تحويلات بين الفروع. المخزون ← التحويلات: الكمية بتخرج من فرع وتدخل التاني في عملية واحدة، بـ إذن تحويل مترقّم. مفيش نسختين تصلّحهم بإيدك.
• تقارير مجمّعة. تقرير الفروع بيحط كل فرع في سطر والإجمالي تحت، لأي فترة: مبيعات كل فرع والإجمالي، والصافي، والفواتير، ومتوسط الفاتورة، والمرتجعات، والخصومات، والربح، والكاش والفيزا والأجل، ومسلسل يوم بيوم، وتصدير CSV. ولوحة النهارده فيها اختيار الفرع — كل الفروع مع بعض أو فرع واحد، وبتفتكر اختيار كل مستخدم.
• الزباين مشتركين في السلسلة. الزبون وحسابه واحد في كل الفروع، فالزبون الدايم في الفرع الأولاني دايم في التاني برضه.
• المستخدمين على فروعهم. كل حساب بيشتغل في الفروع اللي انت بتديهاله؛ واختيار الفرع في التقارير والمخزون والكاشيرات وقوايم الأسعار بيوري كل واحد اللي يخصّه.
• لحد 30 كاشير و30 حساب، على كل الفروع. الفرع اللي بيكبر من كاشير لتلاتة مش بيدفع حاجة زيادة على الكاشيرات؛ وشاشات المطبخ وشاشات العميل مش بتتحسب كاشير أصلاً.

إضافة فرع

1. في المتصفح: الإعدادات ← الفروع ← ضيف فرع. قبل ما تحفظ، الصفحة بتقولك بوضوح هيغيّر إيه في الفاتورة: لحد 10 فروع ولا حاجة، وبعد العاشر «+65 في الشهر من الدورة الجاية» للمحلات (و+125 للمطاعم).
2. اكتب عنوان الفرع وتليفونه ورأس الفاتورة وذيلها بتوعه، وغيّر أي إعداد المفروض يختلف فيه عن باقي السلسلة.
3. اربط كاشيرات الفرع: الإعدادات ← الكاشيرات ← اربط كاشير بتديك كود من 6 أرقام صالح 10 دقايق؛ اكتبه على جهاز الكاشير مع اسم للكاشير. خلّي أول حروف الكاشيرات مختلفة — أول حرف بيبقى بداية أرقام الفواتير المؤقتة.
4. حط فيه بضاعة: تحويل من فرع موجود، أو استلام من المورد على الفرع الجديد مباشرة.
5. ادّي الفرع ناسه: ادعي مدير الفرع وضيف الكاشيرية، كل واحد على الفرع ده.

صباحية من الموبايل (مثال)

مثال لصاحب تلات فروع ممكن يقضي عشر دقايق مع كوباية الشاي، قبل ما ينزل من البيت. كل خطوة صفحة على app.posmasr.com في متصفح الموبايل.

1. تقرير الفروع، امبارح. تلات سطور وإجمالي، بمرتجعات وخصومات كل فرع. فرع شكله أقل من العادي؟ اختاره من اختيار الفرع في لوحة النهارده وبص على يومه.
2. كاش ولا فيزا ولا أجل؟ نفس التقرير بيقسم إيراد كل فرع على الكاش والفيزا والأجل، فالكاش اللي مستنيه في كل درج قدامك في نظرة.
3. المخزون، اختيار الفرع على الفرع التاني. قايمة النواقص بتوريك صنف قرّب يخلص هناك؛ ونفس الاختيار على الفرع الأولاني بيوريك إن فيه كتير.
4. المخزون ← التحويلات. اعمل التحويل من الفرع الأولاني للتاني؛ والإذن المترقّم مستنّي المدير لما يوصل، والكميات مظبوطة في الفرعين من دلوقتي.
5. الأصناف ← قوايم الأسعار المركزية. سعر المورد الجديد من امبارح بيتكتب مرة واحدة؛ وكل كاشير بياخده أول ما يبقى متصل.

مفيش تليفون، ومفيش استنّا حد يقرالك تقرير Z. ولو مش عايز تفتح حاجة خالص، التقرير اليومي على الإيميل وملخص تيليجرام جوه الباقة برضه.

السعر بصراحة

سلسلة المحلات بـ 625 جنيه في الشهر ولحد 10 فروع جوّاها، و65 جنيه في الشهر لكل فرع بعد العاشر؛ وسلسلة المطاعم بـ 1,249 جنيه في الشهر بنفس الـ 10 فروع، و125 جنيه في الشهر لكل فرع بعد العاشر. والفرع الزيادة بيتحسب من دورة الفاتورة اللي بعد ما تضيفه. ولحد 30 كاشير و30 حساب جوه الباقة، فمفيش أرقام غير الباقة والفروع الزيادة. ولحد 3 فروع كمان ينفعوا على البلاتينية: البلاتينية للمحلات بـ 375 والبلاتينية للمطاعم بـ 749 في الشهر:

الدفع بالفيزا عن طريق Stripe؛ ولو مش هتدفع بالفيزا، كلّمنا ونتفق معاك على طريقة تانية. وكل فاتورة، بسطور الفروع الزيادة، موجودة في الاشتراك ← الفواتير تطبعها. وتقدر ترقّي من البلاتينية للسلسلة في نفس خطك أي يوم وتدفع الفرق بس على باقي الشهر؛ بتشتغل لحظة ما تتدفع.

امتى السلسلة مش ليك

• محل واحد، حتى لو زحمة. السلسلة للفروع، مش للكاشيرات. محل واحد لحد 4 كاشيرات بيبيعوا في نفس الوقت مكانه البلاتينية: البلاتينية للمحلات بـ 375 جنيه في الشهر، أو البلاتينية للمطاعم بـ 749 جنيه في الشهر، واللي فيها للمطعم شاشة المطبخ والطاولات والمنيو الأونلاين والطلب من الطاولة.
• محل صغير بكاشير أو اتنين مكانه الفضية للمحلات أو الذهبية للمحلات (125 أو 249 جنيه في الشهر)، أو الفضية للمطاعم أو الذهبية للمطاعم لو مطعم (249 أو 499) — ولو هيفضل صغير سنين، رخصة النسخة المكتبية بتطلع أرخص على المدى الطويل. الحسبة بصراحة في أونلاين ولا على الجهاز.
• فرع تاني لسه بتفكر فيه. ابدأ بالبلاتينية في المحل الأولاني (البلاتينية للمحلات أو البلاتينية للمطاعم)؛ البلاتينية بتاخد لحد 3 فروع، ويوم ما تحتاج الفرع الرابع، رقّي للسلسلة في نفس خطك وضيفه. مفيش حاجة دخّلتها بتضيع في السكة.

إيه اللي محتاج نت، وإيه اللي لأ

البيع مش محتاج. كل كاشير في كل فرع شايل نسخة من المحل على الجهاز وبيكمّل بيع لما خطه يقطع: كاش، فيزا، أجل لحد رصيد الزبون المحفوظ، مرتجعات، ورديات، طباعة ودرج. والفاتورة بتاخد رقم مؤقت زي A-1043 وبتاخد رقمها النهائي لما الخط يرجع. التفاصيل في لما النت يقطع.

اللي بيستنى الخط:

• تعديل الأصناف والأسعار، ومنها قايمة الأسعار المركزية. والكاشير اللي مش متصل بيكمّل بيع بالأسعار اللي عنده وياخد الجديدة لما يتصل.
• صفحات المتصفح والموبايل — التحويلات والتقارير والإعدادات — محتاجة الجهاز اللي في إيدك يكون متصل.
• الفرع اللي خطه قاطع بيظهر في عرض الفروع لحد آخر مزامنة بس؛ وفواتيره اللي من غير نت بتدخل التقرير لما توصل.

لو عندك كافيهات: أكواد الطاولات لكل فرع

سلسلة المطاعم فيها المنيو الأونلاين، وأكواد QR للطاولات والطلب من الطاولة، والمتجر الأونلاين، زي البلاتينية للمطاعم؛ وسلسلة المحلات فيها المتجر الأونلاين، زي البلاتينية للمحلات. وفوق كده، المطعم اللي على سلسلة المطاعم بياخد أكواد طاولات مطبوعة من عندنا: مجموعة لكل فرع في السنة، لحد 40 كود للفرع؛ واللي أكتر من كده أو إعادة الطباعة بنديك سعرها. الزبون بيطلب إزاي والموظفين بياخدوا الحساب إزاي متشرح في المنيو الأونلاين والطلب من الطاولة.

أسئلة سريعة

أقدر أجرّب السلسلة قبل ما أدفع؟
كل محل أو مطعم جديد بيبدأ بتجربة 14 يوم من البلاتينية بتاعة خطه (البلاتينية للمحلات أو البلاتينية للمطاعم)، من غير فيزا. والبلاتينية فيها لحد 3 فروع، فتقدر تضيف الفرع التاني وتشوف التقارير بمبيعات حقيقية قبل ما تدفع أي حاجة. ولو عايز تجرّب أكتر من 3 فروع، ابعتلنا على واتساب وإحنا بنحوّل التجربة للسلسلة في نفس خطك.

فيه حد للكاشيرات في الفرع؟
السلسلة فيها لحد 30 كاشير و30 حساب على كل الفروع، من غير أي زيادة. وشاشات المطبخ وشاشات العميل عمرها ما بتتحسب كاشير في أي باقة.

فرع يقدر يبيع بسعر مختلف؟
أيوه. قايمة الأسعار المركزية فيها سعر واحد للكل، وانت بتحط استثناء للفرع اللي محتاج سعره فعلاً — وتقفله، فالسلسلة تفضل بسعر واحد في كل حتة تانية.

عندي محلين على النسخة المكتبية من PosMasr. أقدر أنقل الاتنين؟
النقل من النسخة المكتبية بيجيب أصناف محل واحد وزباينه ومورّديه وكاشيريته وإعداداته وسنة مبيعات في ملف واحد. إزاي بيشتغل خطوة بخطوة في النقل من الجهاز للأونلاين؛ ولو عندك نسختين، كلّمنا على واتساب قبل ما تبدأ.

اقرا كمان

إدارة المحلسرعة المطبخ وكارت الأختام والرسبي وPower BI الضرائبمنع تكرار تحويلات إنستاباي وضريبة قانون 6/2025 الفلوستقفيل الشفت العمياني وطيارين الدليفري والهامش