الزبون يحجز من موبايله… والزيارة تخلص فاتورة على الكاشير
مواعيد الصالون والعيادة والمغسلة، وحصص الاستوديو، وحجز الطاولات في المطعم — كله جوه PosMasr أونلاين، على نفس الأصناف والزباين والموظفين اللي على الكاشير. محلك بياخد صفحة حجز خاصة بيه الزبون يفتحها من غير حساب، والنوتة عمرها ما بتدّي نفس الكرسي لاتنين في نفس الوقت، وكل زيارة بتخلص بيعة عادية على الكاشير بإيصالها. لا دفتر، ولا «مين اللي قالك الساعة خمسة؟».
أول سنة بخصم 20٪ على كل الباقات أول 12 شهر بالكود
أي محل شغله بالميعاد
لو زبونك بيسألك «فاضي إمتى؟» قبل ما ييجي، يبقى الحجوزات معمولة لك. وأول مرة تشغّلها، معالج الإعداد بيسألك شغلك إيه — صالون، عيادة، مغسلة، صيانة، استوديو، طاولات مطعم، أو حاجة تانية — ويجهّزلك الباقي: الخدمات والموارد والمواعيد، جاهزين تعدّل فيهم.
صالونات وحلاقين
قص وصبغة ودقن — كل خدمة بمدتها وسعرها. الزبون يختار الأسطى، أو «أي حد فاضي»، والدقايق اللي بتنضّف فيها الكرسي بين زبون والتاني بتتحسب لوحدها.
عيادات وأطباء أسنان
كشف ومتابعة وجلسات، كل دكتور بأوضته أو كرسيه، وباكدجات جلسات مدفوعة مقدّم. وتقدر تخلّي الدكتور يشوف زياراته هو بس.
مغسلة عربيات
كل مكان غسيل بياخد عربية واحدة في المرة، وكل خدمة بمدتها: بره، جوه وبره، تلميع. والعربيات اللي بتيجي من غير حجز بتاخد أول ميعاد فاضي.
صيانة وتصليح
موبايلات أو تكييفات أو عربيات: ميعاد تسليم الجهاز على فني أو ترابيزة شغل، ومعاه عربون الأول لو حبيت.
استوديوهات وجيم وحصص
يوجا أو رقص أو استوديو تصوير: جدول حصص بعدد أماكن، الزبون يشوف فاضل كام مكان، والحصة المليانة ليها قايمة انتظار. واشتراكات وباكدجات حصص مدفوعة مقدّم.
مدرسين ومراكز تعليمية
حصص فردي بالميعاد أو مجموعات بعدد كراسي، والحصة الثابتة كل أسبوع بتتكرر لوحدها.
مطاعم وكافيهات
ترابيزة على قد عدد الأفراد: بيتختار أصغر ترابيزة تكفيهم، وترابيزتين بيتضمّوا بس لو انت قايل إنهم ينفع يتضمّوا. وتفضيل القعدة والمناسبة جايين مع الحجز.
وأي شغل تاني بالميعاد
مدرب خاص، مصوّر، مكتب استشارات… اختار «حاجة تانية» في المعالج وظبّط خدماتك ومواردك بنفسك.
صفحة حجز لمحلك، من غير حساب ولا تطبيق
كل محل ليه صفحة لوحده على posmasr.com/menu/اسم-محلك/book، معمولة للموبايل الأول. الزبون مش بيعمل حساب ولا بينزّل حاجة: بيفتح اللينك ويحجز في أقل من دقيقة.
- بيختار الفرع، وبعدين الخدمة — أو كذا خدمة في نفس الزيارة.
- بيختار الموظف اللي بيرتاحله، أو «أي حد».
- بيشوف بس المواعيد الفاضية فعلاً، ويدوس على واحد.
- بيكتب اسمه وتليفونه، ويأكّد.
- وهو بيكتب، الميعاد بيتحجزله 10 دقايق، فمحدش ياخده من قدامه في نص الخطوات.
- وبعد الحجز بياخد لينك «حجزي»: يشوف الزيارة، يغيّر ميعادها أو يلغيها في حدود سياسة محلك، يضيفها على تقويم موبايله، ويعرف الطريق للمحل.
في الدليل: صفحات الحجز للزباين
احجز ترابيزة
على …/reserve عدد الأفراد الأول، وبعدين اليوم والساعة، وتفضيل القعدة، والمناسبة. ولو الميعاد مليان الصفحة بتقترح أقرب مواعيد تانية، أو مكان في قايمة الانتظار.
جدول الحصص
على …/classes حصص الأسبوع وفي كل حصة فاضل كام مكان. والحصة المليانة بتاخد أسامي على قايمة انتظار.
شاركها في كل حتة
كل صفحة بتتشغّل لوحدها من الإعدادات ← الحجوزات، ومعاها لينك تشاركه، وكود QR تطبعه وتعلّقه على الكاونتر، وزرار «احجز دلوقتي» تحطه على موقعك وصفحاتك على السوشيال.
كل اللي الاستقبال محتاجه، قدامه
الحجز بالتليفون، واللي داخل من غير ميعاد، والدكتور اللي متأخر، والزبونة اللي عايزة نفس الميعاد كل أسبوع — الاستقبال بيخلّص كل ده من PosMasr أونلاين، على كمبيوتر المكتب أو على الموبايل.
لوحة النهارده
زيارات اليوم في صفحة واحدة: مين جاي، ومين وصل، ومين على الكرسي، ومين خلص.
النوتة بأربع أشكال
يوم، أسبوع، شهر، أو قايمة. الحجز بالتليفون بياخد ثواني، والزيارة ممكن تتكرر — كل أسبوع في نفس الميعاد — من غير ما تكتبها تاني.
عمره ما بيتحجز مرتين
كل موظف وكل مورد — أوضة، كرسي، مكان غسيل، ترابيزة، جهاز — عليه زيارة واحدة في المرة، أو على قد سعته. والموظف الواحد مايتحجزش في فرعين في نفس الساعة.
قايمة الانتظار
لما زيارة تتلغي، الميعاد مايضيعش: بيتعرض على قايمة الانتظار، ويفضل محجوز شوية للي عليه الدور.
كارت الزبون
نفس زباين الكاشير: كل زياراته اللي فاتت واللي جاية، والباكدجات اللي اشتراها، وكام مرة لغى أو ماجاش.
باكدجات واشتراكات
عشر جلسات مدفوعين مقدّم، أو اشتراك شهري: البيعة إيصال عادي، والجلسة بتتحجز لما الزيارة تتحجز، وماتتخصمش غير لما الزيارة تخلص.
موظفينك، بصلاحياتهم
نفس فريق المحل، مش قايمة تانية. والصلاحيات بتحدد مين يحجز ومين يحاسب ومين يشوف إيه — لحد «الموظف يشوف زياراته هو بس». وكل واحد ممكن ياخد لينك تقويم خاص بيه يتابع يومه من موبايله.
الخدمات هي أصنافك
الخدمة صنف من أصناف المحل، بسعرها وضريبتها، وفوقها اللي الحجز محتاجه: مدتها، والإضافات، ودقايق قبلها وبعدها، والعربون، ولازم تتحجز قبلها بأد إيه.
تقارير بتجاوب على حاجة
كل موظف وكل كرسي مشغول قد إيه فعلاً، واللي ماجوش، وأزحم ساعات الأسبوع — على الشاشة، أو CSV أو Excel أو مطبوعة.
الحجوزات عمرها ما بتألّف إيصال: الزيارة بتخلص بيعة عادية
الفلوس بتفضل مكانها زي النهارده بالظبط. في صفحة البيع — في PosMasr أونلاين أو في برنامج الكاشير — فيه زرار الحجوزات بيفتح «الحجوزات — النهارده»، والزيارة بتمشي لحد السلة.
① وصل
كل سطر فيه الساعة، والزبون، ورقم الحجز، والخدمات، والموظف. الاستقبال بيدوس وصل على الزيارة المؤكدة، وبعدين ابدأ لما الشغل يبدأ.
② الحساب
زرار الحساب بيملا السلة بالخدمات بسعر الحجز، والزبون والموظف متختارين جاهز. ضيف شامبو أو أي حاجة من الرف لو عايزها.
③ الدفع زي كل يوم
كاش، فيزا، الاتنين، أو أجل — الإيصال والمخزون والوردية ماشيين زي أي بيعة بالظبط. وبعدها الإيصال بيتبلّغ للحجوزات والزيارة بتتقفل.
موظفين اتنين، إيصالين
البيعة العادية ليها بيّاع واحد، فالزيارة اللي اتنين اشتغلوا فيها — قصّة مع واحد ودقن مع التاني — بتتحاسب إيصال لكل واحد: «حساب الحجز 1 من 2»، وبعدين 2 من 2. مبيعات كل واحد بتفضل باسمه، ولما الاتنين يتدفعوا الكاشير بيقول «الإيصالات اتبعتت للحجوزات».
- العربون اللي اتاخد قبل كده بيتخصم في نفس البيعة، فالزبون بيدفع الباقي بس.
- وجلسة الباكدج بتتخصم هنا، مرة واحدة، وعمرها ما بتتخصم مرتين.
الزبون اللي على الباب ياخد أول ميعاد فاضي — حتى والنت قاطع
زرار «أول ميعاد متاح من غير حجز» بيسأل أربع حاجات — الخدمة، والموظف، والاسم، والتليفون — و«سجّل الزيارة» بيحطه في أول مكان فاضي.
- بيشتغل والنت قاطع: الكاشير بيحتفظ بالزيارة وبيبعتها أول ما الخط يرجع.
- ولو حد حجز نفس الميعاد أونلاين في الوقت ده، مفيش حاجة بتتمسح: الزيارة بتتعلّم «محتاجة مراجعة في الاستقبال» وبني آدم هو اللي يقرر.
- وزرار «رقم الدور» بيطبع للزبون رقمه على طابعة الكاشير نفسها.
الزبون فاكر ميعاده… عشان الرسالة جاهزة
حداشر رسالة جايين مكتوبين، وتقدر تغيّر كل كلمة فيهم: الحجز وصل، اتأكد، تذكير، الميعاد اتغيّر، اتلغى، العربون، مكان فضي من قايمة الانتظار، «وحشتنا»، شكراً، ميعاد الزيارة الجاية، وكل سنة وانت طيب.
- على الإيميل بيتبعتوا لوحدهم، أول ما الإيميل يتظبط.
- وعلى واتساب بيستنوا في قايمة «للإرسال»: دوسة واحدة بتفتح واتساب والرسالة مكتوبة للزبون جاهزة، والموظف عندك هو اللي بيدوس إرسال.
- ومواعيد هدوء، عشان محدش ياخد تذكير الساعة اتنين بالليل، والزبون اللي قال مش عايز رسايل مابيوصلوش حاجة.
الكرسي اللي بيفضل فاضي بيخسّرك. وده إزاي تحميه.
عربون قبل الزيارة
حط عربون على الخدمة، وصفحة الحجز بتوري الزبون تعليمات الدفع بتاعتك انت. والحجز بيفضل طلب لحد ما حد من الموظفين يسجّل العربون؛ وساعتها بيتأكد.
والعربون ماشي في مسار العربون العادي بتاع المحل: تاخده، ترجّعه، أو تحتفظ بيه. وفي الحساب بيتخصم من الفاتورة.
كمان: التقسيط والعربون
لما الزبون مايجيش
علّم على الزيارة إن الزبون ماجاش، ورسالة «وحشتنا» بتبقى جاهزة تتبعت. وكارت الزبون بيعدّ مرات الغياب والإلغاء، فالاستقبال عارف هو بيكلّم مين.
والزبون اللي متعوّد على كده تقدر تمنعه يحجز أونلاين — ويفضل يقدر يتصل. ورسوم الغياب موجودة بس لو انت شغّلت الإعداد، ودايماً بسبب مكتوب جنبها.
الحجوزات في باقة بيزنس والسلسلة
الحجوزات جزء من PosMasr أونلاين — أونلاين، من غير ما تسطّب حاجة — في الموقع وفي برنامج الكاشير. ومش موجودة في البرنامج على جهازك.
بيزنس
بالكود: 2,000 ج.م في الشهر أول سنة
- الحجوزات كلها لمحل واحد: مواعيد وحصص وطاولات
- صفحات الحجز، والرسايل، والعربون، والباكدجات، والتقارير
- 4 كاشيرات بتبيع في نفس الوقت، و 15 حساب
سلسلة
بالكود: 4,000 ج.م في الشهر أول سنة
- الحجوزات في كل فرع، والزبون بيختار الفرع من صفحة الحجز
- الموظف الواحد عمره ما بيتحجز في فرعين في نفس الساعة
- كل اللي في بيزنس، في كل فرع
كل محل جديد بيبدأ بـ 14 يوم من بيزنس، ببلاش ومن غير فيزا — فالحجوزات موجودة تجرّبها من أول يوم. كل الباقات جنب بعض ←
إجابات سريعة عن الحجوزات
الزبون محتاج تطبيق أو حساب؟
لأ. بيفتح لينك صفحتك، أو يمسح الكود بتاعها، يختار ميعاد ويكتب اسمه وتليفونه. خلاص كده.
ممكن اتنين يحجزوا نفس الميعاد؟
لأ. كل موظف وكل مورد بياخد زيارة واحدة في المرة، أو على قد سعته، والميعاد بيتحجز للزبون 10 دقايق وهو بيكتب. والزيارة اللي اتسجلت والنت قاطع لو جت على ميعاد محجوز مابتمسحش حاجة؛ بتتعلّم عشان الاستقبال يراجعها.
تذكير الواتساب بيتبعت لوحده؟
لأ. رسايل الواتساب بتستنى في قايمة «للإرسال»، والموظف بيبعت كل واحدة بدوسة. الإيميل بيتبعت لوحده أول ما يتظبط. والـ SMS مش موجودة.
الزبون يقدر يدفع العربون بالفيزا أونلاين؟
لسه. الصفحة بتعرض تعليمات الدفع بتاعتك، والحجز بيفضل طلب لحد ما الموظف عندك يسجّل العربون.
رقم تليفون الزبون بيتأكد منه؟
لأ، مفيش كود تأكيد. وعشان كده كارت الزبون بيعدّ الغياب والإلغاء، وتقدر تمنع زبون من الحجز أونلاين.
طب مواعيد رمضان؟
بتكتب تواريخ رمضان ومواعيدها بنفسك، والحجوزات بتمشي عليها.
بتشتغل في البرنامج اللي على جهازي؟
لأ. الحجوزات في PosMasr أونلاين — الموقع وبرنامج الكاشير — في باقة بيزنس والسلسلة.
فيه حاجة لسه مابتعملهاش؟
أيوه، ونحب نقولها بنفسنا: مفيش دفع عربون بالفيزا أونلاين، ولا واتساب أو SMS أوتوماتيك، ولا تأكيد لرقم التليفون، ولا قسايم هدايا، ولا صور قبل وبعد.
